Page 11 et 12 (corrigé)
http://books.google.fr/books?id=71MFAAAAQAAJ&printsec=titlepage&dq=#PRA6-PA11,M1
Fig. I. exhibet sectionem antliae plano, illius fundo verticali per ejusdem axem posito, formatam. ABuo est corpus antliae, seu cylindrus utrinque apertus, longitudine 10, diametro 2 pollices rhenanos adaequans, utrinque apertus, ad AB operculo in medio perforato claudendus ad ou vero limbo prominente, cujus latitudo uni, crassities dimidio pollici aequatur, instructus, cujus ope vi cochlearum w, x illi applicari possit fundus FE. Diameter hujus fundi, cujus crassities unum pollicem adaequat, cum limbi CD diametro convenit. In medio crassitiei hujus fundi juxta lineam re, ipsis CD, EF parallelam, terebra formandus est canaliculus rne, alio canaliculo en, per fundi centrum ipsi verticali secandus : quo facto canaliculus en argilla humida obturandus est, et hac exsiccata canaliculus rn stanno liquefacto implendus. Denique argilla e canaliculo en retracta orificium conicum ae ita elaborandum est, ut illius superficies basi opposita, sive basis abscissae coni partis terminetur extremitate e canaliculi ne; huic vero orificio conico exacte congruens parari debet obturaculum conicum, juxta directionem axis retro producti bacillo instructum, cujus longitudo a cylindri altitudine interna non nisi ipsa hujus coni truncati altitudine deficiat. Hic bacillus per coriorum strata compressa oleoque penetrata, ex quibus embolus MNOP componitur, ita transmittendus est, ut adfrictus ope illis fortiter adhaereat, nec aëri transitum permittat. Caeterum embolus MNOP ad v instructus est valvula, aëri vel arcendo, vel ope canaliculi ad R aperti transmittendo idonea, praetereaque ad R illi adhaeret bacillus QR, cujus manubrium est ST.
Denique ope cochleae perforatae c supra fundum FE prominentis illi adjungitur tubus cb sphaerae bdfg epistomio kl instructus. Ad f autem haec sphaera habet cochleam perforatam prominentem, quae inseritur tubo fp hemisphaerii pqt, pariter epistomio hs instructo. Hujus hemisphaerii loco vas intermedium cylindricum seu campaniforme commode adhiberi posse ex supra dictis liquet.
§. 12. Ponamus igitur embolum, postquam fundo cylindri ita appressus fuerit, ut linea PO cum ipsa ou congrueret, ope manubrii elevari, manifestum est, illum attollere totam columnam aëris ipsi incumbentem, eamque per orificium operculi expellere, qua ratione intra fundum emboli ac fundum cylindri relinqueretur vacuum. Cum vero bascillus obturaculi conici ac ex hypothesi coriis emboli adfrictus ope adhaereat, embolus hunc bacillum secum attollit, eoque obturaculum conicum ex orificio ipsi congruente extrahit, quare aëri in sphaera incluso locus datur in vacuam cylindri cavitatem succedendi. Embolus autem obturaculum conicum non ad majorem ipsius altitudine distantiam ex orificio conico extrahere potest, quoniam, simul ac hunc terminum attigit, extremitas z bacilli ipsius puncto m operculi AB apprimitur, ut non altius ascendere possit. Quo facto embolus juxta totam hujus bacilli longitudinem, superata affrictus vi ascendere solus pergit. Quodsi denique, postquam in contactum operculi adductus fuerit, jam deprimi incipiat embolus, pariter affrictus ope secum deprimere incipit obturaculum conicum, donec illud in orificium ipsi congruens reposuerit. Quod vero cum, statim sub initium cujuscunque descensus eveniat, postea embolus solus juxta ejusdem bacilli longitudinem descendit; cumque descendens aërem, qui ex sphaera in cylindri cavitatem successerat, fortiter comprimat, hic vero aër orificio conico clauso in sphaeram redire non possit, elasticitatis vi valvulam v versus superficiem MN mobilem aperiens per orificium R supra embolum excedit, cujus nova elevatione demum per orificium y expellitur.