མི་ཚེའི་རིན་ཐང་།
- Details
- Category: བཅད་རྩོམ
- Written by དྲ་བའི་དོ་བདག
ཡོང་ཁུངས། ངེད་དྲ་བ། རྩོམ་པ་པོ། མེ་ཕུང་།
གང་གི་མངལ་ལས་ལྷུང་བའི་ཉམ་ཆུང་གི་ཚེ་སྲོག། དོན་མེད་རླུང་ལ་མ་བསྐུར་གདོང་དམར་བའི་བུ་རྒྱུད།།
མ་བཅོས་སེམས་ཀྱི་ཤུགས་གླུ་མཁའ་དབྱིངས་སུ་གྱེར་ན།། ངོ་མཚར་འཕྲུལ་གྱི་མེ་ཏོག་རང་ས་ནས་གྲོལ་ཡོང་།།
གཉེན་གྲོགས་ཡུལ་ལ་མ་ཆགས་སྐད་ཅིག་གི་འགྲོན་པོ།།
སྟོབས་འབྱོར་གྲགས་པར་མ་བརྩོན་རྨི་ལམ་གྱི་ལོངས་སྤྱོད།།
རྙེད་དཀའ་རིན་ཆེན་དཔག་བསམ་ལྗོན་པ་ལ་བརྟེན་ནས།།
ཤ་ཟད་རུས་ལ་ཐུག་ཀྱང་དམ་ཆོས་ལ་འབད་དགོས།།
རྨོངས་མུན་དྲ་བར་ཚུད་པ་སྔོན་ལས་ཀྱི་འབྲས་རེད།།
མུན་འཇོམས་བཤེས་ལ་འཕྲད་པ་ཡུལ་དུས་ཀྱི་སྐལ་རེད།།
འཆད་རྩོད་རྩོམ་གྱི་ཀློང་ནས་ཕ་རོལ་ཏུ་བརྒལ་ན།།
མི་ཚེའི་དབྱངས་རྟ་མ་འོངས་རྗེས་རབས་ལ་སྤྲད་ཆོག།
སྡིག་ལྡན་འཁོར་བའི་ཉེས་དམིགས་སྙིང་དབུས་སུ་སྒོམ་ན།།
འདར་འདར་ལུས་ཀྱི་བ་སྤུ་ཡོམ་ཡོམ་དུ་གཡོ་ཐལ།།
མི་ཚེ་ལྟ་བའི་རིན་ཐང་ངོམ་རྒྱུ་རེ་བྱུང་ན།།
ག་དུས་ཤི་ཡང་མིག་ཟུང་བདེ་བའི་ངང་བཙུམ་ཆོག།
