ཁེར་བཤད།

མི་ཚེ་རིན་ཐང་ཟེར་བ་ག་བར་འདུག་གམ། གཅིག ཕ་མས་གནང་བའི་རིན་ཐང་ག་བར་ཡོད་དམ། ནམ་རྒྱུན་མི་རྣམས་ཀྱིས་ཕ་མ་བཀའ་དྲིན་ཆེན་པོ་ཡིན་ཚུལ་གྱི་སྐད་དེ་ཁྱེར་ནས་འོང་དུས། ཕ་མ་གཉིས་ཀྱིས་ལུས་རྟེན་གནང་བ་བཀའ་དྲིན་གྱི་གཙོ་སྙིང་དུ་ གླེང་ནས་བརྗོད་ཀྱི་ཡོད་རུང་། མི་ཚེ་རིན་ཐང་འཚོལ་སྙེགས་བྱེད་མཁན་གྱི་མི་ཞིག་གི་ངོས་ཐད་ནས་གླེང་ན། ལུས་རྟེན་ནི་བཀའ་དྲིན་གྱི་ཟུར་ངོས་ཙམ་ཞིག་ ལས། གཙོ་སྙིང་ཡེ་ནས་མ་ཡིན་ཏེ། ལུས་རྟེན་ཡོད་པ་ཙམ་གྱིས་མི་ཚེ་རིན་ཐང་དང་བླ་མེད་བྱ་བཞག་ཟེར་བ་སོགས་འབད་མེད་ལྷུན་གྲུབ་ཀྱིས་གང་ནས་ཡོང་ སྲིད། དངོས་གནས་བཤད་ན། ཕ་མ་དག་གིས་བརྩེ་བ་ངོ་མ་ཞིག་གི་འཛུམ་རིས་དང་འགྲོགས་ནས་སེམས་པ་གསོན་པོ་ཞིག་གི་དྲོད་ཁོལ་གནང་ཞིང་། དུངས་སེམས་ རྣལ་མ་ཞིག་གིས་བུ་ཕྲུག་ཚོའི་ཤ་པགས་རུས་གསུམ་གསོ་ཞིང་སྐྱོང་བ་དང་།བུ་ཕྲུག་ཚོའི་བཞིན་ལ་འཛུམ་མདངས་ཉམས་དགའ་བ་རེ་ཤར་དུས་ནི་ཁོང་རང་ཚོའི་ བདེ་སྐྱིད་ཀྱི་རྩ་བར་བརྩི་བ་ནི། ཕ་མའི་བཀའ་དྲིན་དུ་བསམ་ཆོག་ལ། ད་དུང་ཕ་མ་གཉིས་ཀྱིས་རང་གི་བུ་ཕྲུག་ཚོ་འགྲོ་བ་མིའི་རིགས་ཡོངས་ལ་ཕན་བདེ་བསྐྲུན་ མཁན་གྱི་བུ་རྒོད་ཐོག་འདྲ་བ་རེ་མ་གྱུར་ནའང་། རང་ཉིད་ཀྱི་བདེ་སྐྱིད་དེ་གཡོ་སྒྱུ་ཁྲམ་གསུམ་གྱི་སྒོ་ནས་གཞན་གྱི་བདེ་སྐྱིད་བཅོམ་བརླག་གིས་སྟེང་ནས་མི་ འཚོལ་ཞིང་། ཡ་རབས་ཚུལ་མཐུན་དང་རྒྱུ་འབྲས་དྲང་སྙོམས་ཀྱི་རྔུལ་ཆུས་བསྐྲུན་པར་རེ་ཞིང་། རེ་བསྐུལ་གྱིས་གནང་བའི་བསླབ་བྱ་དག་ནི་ཕ་མའི་གནང་བའི་ བཀའ་དྲིན་གྱི་ནོར་དུ་བསམ་དགོས་ལ། དྲན་ཡང་དགོས། དྲན་ཤེས་དེ་ལ་བརྟེན་ནས་ཕ་མའི་བཀའ་དྲིན་གྱི་ཡང་སྙིང་ག་བར་ཡོད་པ་ཤེས་ལ། བུ་ཕྲུག་ཚོས་ཀྱང་ ལོ་ཟླའི་འཕེལ་བར་ནས་ཕ་མའི་བཀའ་དྲིན་སྙིང་ལ་ཉར་ཞིང་། དྲིན་ལན་ལག་ལེན་ལ་གསབ་པར་འཁྱོལ་རྒྱུ་ནི་མི་ཚེ་རིན་ཐང་ཉིད་དུ་འབོད་པའི་རིན་ཐང་ངོ་མ་ ཞིག་ཏུ་ཧ་གོ་བར་བརྩིས་ཆོག་གོ། གཉིས། དགེ་རྒན་གྱིས་བསླབ་པའི་རིན་ཐང་ག་བར་ཡོད་དམ། 　 དགེ་རྒན་གྱིས་གནང་བ་ནི་ཡི་གེ་འབྲི་ཀློག་ནས་བཟུང་གཞུང་ལུགས་གང་ཡང་རུང་བ་ཞིག་ལ་འགྲེལ་བཤད་རྒྱག་ཐུབ་ཙམ་དང་། ཚིག་བཅད་ལྷུག་གི་ རྩོམ་ཡིག་ཐར་ཐོར་རེ་འབྲི་ཐུབ་པ་དེ་ཙམ་ལ་ངོས་འཛིན་བྱེད་ན་ག་ལ་འགྲིག ཁོང་གིས་བླ་མེད་ལྷག་བསམ་གཙང་མ་ཞིག་གི་རླབས་རྒྱུན་སློབ་བུ་ཚོར་དྲངས་ཤིང་། འཛད་མེད་ཤེས་རིག་ནོར་གྱི་གཏེར་མཛོད་དེའང་སློབ་བུ་ཚོར་གནང་བར་མ་ཟད། ཆེ་ས་ནས་སློབ་བུ་ཚོས་འགྲོ་བ་ཡོངས་ལ་ཕན་བདེ་རེ་བསྐྲུན་པར་རེ་ཞིང་། ཆུང་ ས་ནས་རང་རང་གིས་གང་ཤེས་པ་དེ་རང་རྒྱུད་ལ་སྦྱར་ནས་རང་དོན་ཚུལ་བཞིན་སྒྲུབ་པའི་ཞོར་ལ། ཉམ་ཆུང་གཞན་དག་གི་འཚོ་བའི་དགོས་མཁོ་སོགས་ལ། རོགས་ཕན་གང་ཐུབ་ཅི་ནུས་རེ་སྒྲུབ་པའི་བསམ་བློ་རྙེད་པའི་ལམ་དུ་འཁྲིད་པ་ནི། སློབ་བུ་ཚོས་རང་ཉིད་མི་ཞིག་ཡིན་པ་དང་། མི་ཞིག་ཡིན་ན་ཆེས་མ་མཐའ་ཡང་ དུད་འགྲོ་ཟེར་བའི་སྲོག་ཆགས་གླེན་པ་དེ་ཚོ་ལས་ཅུང་ཁྱད་པར་འཕགས་པ་ཞིག་ཡིན་པ་ཧ་གོ་རུ་བཅུག་པ་རེད། དེ་ལྟར་མིན་་པར་རང་དོན་གཅིག་པུ་ལ་འབད་ ནས་རང་ཉིད་ཁོ་ནའི་ལྟོ་རྒྱབ་ཙམ་འཛོམས་སོང་ན། ཆེས་བདེ་ཞིང་སྐྱིད་པའི་བསམ་པ་རེ་བཟུང་ན་ནི། ང་ཚོས་གླེན་ལྐུགས་སུ་འདོད་པའི་དུད་འགྲོ་དག་གི་ཁྲོད་ ནའང་།ང་ཚོ་ལས་ཁྱད་དུ་འཕགས་པ་མང་པོ་ཡོད། དེས་སྟབས་སློབ་བུ་ཚོས་དགེ་རྒན་ནི་གཞན་གཅེས་བསམ་བློའི་སྟོབས་དང་མངའ་ཐང་དུ་བཟུང་ནས། ཁོང་ གིས་ས་སྨྱུག་གིས་བྲིས་པའི་འོད་ཟེར་གྱི་ཡིག་འབྲུ་སྙིང་ལ་བཀོད་ཅིང་། ཟླ་མེད་རིན་བྲལ་གྱི་བསླབ་བྱ་སྣ་ཚོགས་སེམས་སུ་བཅུག་ནས་གཞུང་ལུགས་རྣལ་མ་ཞིག་གི་ ཕ་མཐར་ བརྒལ་རྗེས། རང་གི་ཕ་མེས་ཡང་མེས་ནས་བརྒྱུད་ཅིང་འོང་བའིིི་རིག་གཞུང་སྣ་འཛོམ་པོ་དེ་དག་རང་གི་བུ་རབས་ཚ་རྒྱུད་ལ་བརྒྱུད་སྤྲོད་བྱེད་པར་ སྤྲོ་བས་བརྟས་ཤིང་། གཞན་གྱི་རིག་གཞུང་སྣ་མང་གི་ཉིང་བཅུད་ལེན་པའི་སྙིང་སྟོབས་ལྡན་པར་བྱས་ན་ནི། དགེ་རྒན་གྱིས་བསླབ་པའི་མི་ཚེ་རིན་ཐང་དངོས་ གནས་དེ་ཟིན་འདུག་ཅེས་བཤད་ཆོག་གོ། གསུམ། རང་ཉིད་ཀྱིས་འཚོལ་བའི་རིན་ཐང་ག་བར་ཡོད་དམ། མི་ཚེ་བརྒྱུད་ལམ་རིང་མོའི་ཁྲོད་དུ་བྱ་ལས་གང་ཞིག་ཡིན་ཡང་། རང་བཞིན་གྱིས་འོང་བ་དང་རྩོལ་མེད་ཀྱིས་གྲུབ་པ་ཞིག་ཡོང་མི་སྲིད་པས། དུས་རྣམ་ཀུན་ཏུ་ བརྩོན་སེམས་ཀྱི་ངར་ཤུགས་ཤིག་ཡོད་དགོས་ལ། གཞན་གྱིས་དེ་ལྟར་སྒྲུབ་ཐུབ་ན་བདག་གིས་ཀྱང་དེ་བཞིན་སྒྲུབ་ཐུབ་པོ་སྙམ་པའི་བློ་སྤོབས་དེ་ཡོད་ན་ནི། རང་ གིས་ཀྱང་མི་ཚེ་རིང་ཐང་ཟེར་བ་རྙེད་ཐུབ་ལ། བླ་མེད་བྱ་ལས་ཤིག་ཀྱང་ངེས་པར་བསྒྲུབ་ཐུབ་པས་ན། གནའ་མི་རྒན་པོ་ཉམས་མྱོང་ཅན་དག་གིས་ཀྱང་འདི་ལྟར་ འཆད་ཡོད་དེ། བརྩོན་པའི་དཀའ་བ་དང་བླངས་ན།། མི་འགྲུབ་བྱ་བ་གཅིག་ཀྱང་མེད།། ཅེས་སྐད་ཆ་འདི་ཁོ་ཚོའི་ངག་སྒོ་ལས་ཤོར་ག་ལ་སྲིད། དེ་ལྟ་མིན་པར་ བདག་ནི་ཁོ་ཚོ་ནང་བཞིན་བློ་རིག་གྲུང་བོ་དང་མཐུན་རྐྱེན་འཛོམ་པོ་མེད་ཅེས་རང་གིས་རང་ལ་བརྙས་ཤིང་ཁྱད་དུ་བསད་ན། མཐའ་མའི་གྱོང་ཁ་རང་གིས་ཁུར་ དགོས་པའི་རྒྱུ་མཚན་སྙིང་ལ་ཡལ་མེད་འཆིང་བཞིན་བརྩོན་སེམས་ཆགས་མེད་བྱས་ན་རླབས་ཆེན་བྱ་བཞག་རང་གིས་བསྐྲུན་ཐུབ་ལ། མི་ཚེ་རིན་ཐང་རང་གིས་ བཞེངས་འགྲོ་བའི་གནས་ལུགས་དང་། ཆོས་ཉིད་དག་ཀྱང་མ་བརྗེད་པ་བྱ་དགོས། སྤྱིར་བྱ་ལས་གང་ཞིག་སྒྲུབ་དུས་མཐུན་རྐྱེན་ཟེར་བ་དེའང་དགོས་དངོས་ཤིག་ ཡིན་པ་བདེན་མོད། འོན་ཀྱང་གཙོ་བོ་རང་ཉིད་ཀྱི་བློ་སྟོབས་ཉིད་ལས། གཞན་དག་མཐུན་རྐྱེན་ཟེར་བ་སོགས་ལ་རང་བཞིན་གྱིས་ལྟོས་མེད་དུ་ཆགས་འགྲོ་བས། ཕྱི་གླིང་རྒན་པོ་མགོ་སེར་ཞིག་གིས། ལས་བསྐལ་ལ་ཁག་དཀྲི་བ་ནི་ནུས་མེད་ཉམ་ཆུང་ཚོའི་ཁ་གཡར་ས་ཁོ་ན་ཡིན། ཞེས་སྟོབས་ཀྱིས་བསྒྲགས་ཤིང་ཤུགས་ཀྱིས་གྱེར་ མྱོང་བ་དག་ཀྱང་ཞ་དང་ཞོར་ལ་དྲན་རྒྱུ་མ་བརྗེད་ལ། དེ་ལྟའི་བརྩོན་སེམས་ཀྱིས་ལོ་ཟླའི་གོ་རིམ་མང་པོ་བརྒྱུད་ནས་མཁས་པའི་རྒྱལ་ཐབས་ཟིན་དུས་ཀྱང་། ཕ་མ་ དང་དགེ་རྒན་དག་གིས་གནང་བའི་བསླབ་བྱའི་ཚིག་རིས་རྣམས་རང་གི་བསམ་བློའི་སྟོབས་འབྱོར་དགུང་དུ་འདེགས་བྱེད་ཀྱི་དཀྱིལ་སྙིང་དུ་འཛིན་རྒྱུ་ནི། འོད་ ཟེར་གྱི་ལམ་ཁ་དཀར་པོ་ཞིག་སྟེ། མི་ཚེ་རིན་ཐང་ཉིད་ཡིན་སེམས་སོ།། ༢༠༡༢ ༤ ༢༩ མཚན་མོར་བཀྲས་ལྷུན་དགོན་དུ་བྲིས།