ཁ་སང་། མེ་ཏོག་ལྟ་བུའི་ལྟོ་ཁྲག་དམར་པོ་ཞིག་དང་། པུ་ཝང་ལྟ་བུའི་སྐད་ངག་སྙན་མོ་ཞིག་གིས། ཆེས་གུ་དོག་པའི་ཨ་མའི་གྲོད་ཁོག་ནས་བསུ་དུས། ཞོགས་པའི་ཉི་ཟེར་བཞིན་གྱི། ང་ཚོའི་མིག་མདུན་ན་དཀར་མདངས་ཤིག་གིས་ཀུན་ཏུ་ཁྱབ།/////// ཉི་མ་དང་ཟླ་བ་ཁྱད་མེད་པར། བར་སྣང་འདིའི་མཐོ་ས་ནས་འགྲེང་དུས། ཉིན་མོ་དང་མཚན་མོ་སྲུབ་པའི་ང་ཚོས། ས་ཆེན་འདི་ནས་རྒྱང་བལྟ་ཐེངས་གཅིག་གི་གོ་རིམ་རྙེད།//////// དལ་བུ་དལ་བུར་ནམ་ཟླའི་འགྱུར་འགྲོས་དང་བསྟུན་ནས། འགྲོ་མ་གོག་གི་བྱིས་པའི་ཚུགས་མ་ལས་བརྒལ་དུས། བྲག་རྫོང་གི་ངོགས་དང་རྩྭ་ཐང་གི་ངོས་ནས། བེའུ་ཆུང་ཆུང་དེ་དང་ལུ་གུ་དཀར་ནག་དེ་ཚོ། ང་ཚོའི་དབང་པོའི་ཡུལ་ན་སྤྲིན་ཕུང་ཇི་བཞིན་རྒྱུན་དུ་རྩེན།//////// ཨ་མའི་རྔུལ་ནག་དང་ཨ་མྱེའི་གཉེར་མ། ད་དུང་།ང་ཚོའི་འབྱུང་འགྱུར་གྱི་སང་ཉིན་ལ་གཞིག་ནས། ཡར་བསྐྱར་གོམ་ཁ་ལྷག་མ་རེ་སྤོ་དུས། དཔེ་ཁུག་ཆུང་ཆུང་དེ་དང་དཔེ་དེབ་གྲི་བཞི། སྨྱུག་ཞག་སྣུམ་པོ་དེ་དང་འབྲི་དེབ་ངོས་འཇམ་དེ་ཚོ། རེ་རེ་བཞིན་རང་ཉིད་ཀྱི་བསམ་པའི་ཞིང་ས་ན་བཞེས་ཏེ། འཇིག་རྟེན་འདི་ལ་འགྲིག་རྟགས་དང་ནོར་རྟགས་མང་པོ་ཞིག་འཐེན་པར་རྩོམ།//////// དལ་བུ་དལ་བུར་ལོ་ཟླའི་སོ་ཁ་ནས་རྒས་དུས། ཕྱི་མིག་གི་ལམ་ནས་རང་ཉིད་འཚོལ་བཞིན། སླར་ཡང་སྡོམ་ཚིག་གཞན་ཞིག་གི་གཡོབ་མོ་འོག་ནས། རང་ཉིད་འཇིག་རྟེན་འདི་དང་གཏན་དུ་གྱེས་པར་རྩོམ།